Ամենաարտասովոր 5 տոնածառն աշխարհում (լուսանկարներ)

Ամանորյա տոնն, անկասկած, էլ ավելի ջերմ ու գեղեցիկ է դառնում շքեղ տոնածառերի զարդարմամբ: Տոներին ընդառաջ Luxlux.net-ը ներկայացրել է ամենաարտասովոր տոնածառերը:

Մաքուր ոսկուց պատրաստված տոնածառ

Այս տարի Ճապոնիայի մայրաքաղաքում ներկայացվել է ամենաշքեղ տոնածառը՝ պատրաստված մաքուր ոսկուց, որն ստեղծել է Տոկիոյի հայտնի ոսկերիչը: 2.5 մետր բարձրություն ունեցող ամանորյա գեղեցկուհին կշռում է 12 կգ: Բացի այդ՝ այն զարդարված է 50 խոլորձներով, 50 ոսկյա սրտիկներով: Ոսկյա գեղեցկուհու ընդհանուր արժեքը կազմում է 2 մլն դոլար:

Շոկոլադե տոնածառ

Մաքուր շոկոլադից պատրաստված փարիզյան տոնածառը կարելի է համարել ամենայուրահատուկ տոնածառերից մեկը: Անցյալ տարվա դեկտեմբերին հրուշակագործներն այն պատրաստել էին 4 տոննա սև շոկոլադից: Այս գործընթացն անձամբ ղեկավարել է հայտնի ֆրանսիացի շոկոլադագործ Պատրիկ Ռոժերը:

Լողացող տոնածառ

Բրազիլիայում որոշել են ստեղծել ամենաշքեղ լողացող տոնածառը: Ռիո դե Ժանեյրոյի Լագոա լճում անցյալ տարի տեղադրել են հսկա լողացող տոնածառը, որը կշռում էր 542 կգ: Գեղեցկուհու բարձրությունը կազմել է 85 մետր: Այն զարդարվել է 3 մլն լապտերներով, որոնցով սուրբծննդյան պատկերներ էին ստեղծվել:

Տոնածառ՝ համբույրների համար

Անցյալ տարի Լոնդոնում տեղադրվել է թերևս՝ ամենայուրահատուկ տոնածառը, որը լուսավառվում էր համբույրի ժամանակ: Այն զարդարել էր հանրահայտ Քովենթ Գարդեն թաղամասը: Տոնածառի լույսերը վառվում էին, երբ զույգը, մոտենալով դրան, երկու ձեռքով վերցնում էր ճյուղերը, միացնում իրար և համբուրվում:

Ստորջրյա տոնածառ

Մի քանի տարի առաջ Խորվաթիայում Սուրբ Ծնունդից առաջ տեղադրվել էր աշխարհի միակ ստորջրյա տոնածառը, որը խաղալիքներով և տարատեսակ լապտերներով զարդարել էին ջրասուզորդները: Տոնածառի բարձրությունը հասնում էր 8 մետրի, և այն երեկոյան ժամերին երևում էր ջրի տակից, երբ վառվում էին տոնածառի լույսերը: